شايف المواد اللي بتدرسها في الكليه ليها علاقه بسوق العمل ولا مامنهاش فايده ؟

هو عموما كتير منا بيذاكر ويحفظ علشان التقدير بس وبيكون ده هدفه من الاول لكن انا عن نفسى بشوف ان فى مناهج كتيييييييره جدا مش ليها لازمه او ممكن تتفهم ويكون ليها معنى لو فيها جانب عملى على الاقل نكون حاسين اللى بنذاكره وبلاش بقى الدش الزايد عن حده ده لاننا بعد كده اكيد لما نروح نشتغل مش هيقولوا لنا سمعوا الكتاب الفلانى للدكتور الفلانى هيقولوا انت بتعرف تعمل ايه مش حافظ ايه!!!

طبعا زى ما قالت سمورينا المواد الكتيرة دى اللى ملهاش لازمة مثلا زى التاريخ هو مثلا لما اجى اشتغل هيقلولى انت عارف ايه عن التاريخ و قولنا نبذة منه لا اكيد ان ده هيسبوه علينا فى تنميه معلومتنا الثقافية بنفسنا بس مش تتحسب من ضمن المواد اللى تضيعنا زى مثلا من المواد الرخمة القانون الدولى اوف رخمممم انا حسيت و انا فى المحاضرة انى فى حقوق و الصراحة مستفدتش حاجة المفروض اننا ندرس حاجة ليها علاقة بالتخصصات ولا انتو شايفين ايه؟ بس انا حاسة ان فعلا بعض المواد مالهاش اى لازمة

وانا بوافقكوا الرأى اوى بس فى حاجة مادة زى السياسة ومادة زى القانون الدولى لازم تبقى موجودة وبالرغم من كده المواد اللى احنا بندرسها دى مش كافية لازم نثقف نفسنا بنفسنا، وبعدين عايز اقول على حاجة اكبر دليل على ان فى مواد ملهاش علاقة بسوق العمل ان فى ناس كتييييييييييييييرة بتشتغل فى الاعلام وهى مش خريجة كلية الاعلام

فعلا ان فيه طبعا مواد مهمة و جميلة كمان و اكيد فى تانية سواء اى قسم هنبتدى ناخد مواد ليها علاقة اكتر بسوق العمل و طبعا انا مش بقلل من قيمة القانون الدولى فهو مادة من المواد المهمة بس الصراحة انا مش بحبها فهى بالنسبة لى يهمنى بس انى اعرف يعنى ايه قانون دولى و انى مبقاش جاهلة فى المادة بس مش كتاب قد كدة و انا قصدى كمان ان احنا ناخد كم معين يناسبنا و يناسب احتياجاتنا بس اقولكو حاجة كل دة بعد كدة هيتنسى مش هيبقى موجود غير حاجات قليلة و مش هنفتكر الباقى و مش هيبقى موجود غير مواد التخصص و كمان مش هتثبت غير بعد تدريب بقى و كدة

و عندك حق يا محمد فعلا انا عارفة ناس شغلين فى مجالات غريبة مالهاش علاقة بالاعلام بس بعد كل ده انا سعيدة اوى فيها مع ان الدكاترة بيمشونا على مزاجهم فى الدرجات بس مش مهم...

وده اهم حاجةاننا نكون فرحانين بكليتنا،وعلى فكرة بالرغم من كده اسم كليتنا فى سوق العمل له وزنه

لا طبعا مش كل المواد ليها لازمة فى شوية مواد عجيبة كده ولا ليها اى لزمة فى الحياة
يعنى مادة زى علم النفس ولا القانون الدولى انا مش شايف انهم ليهم اى قيمة ولا هيفيدونى فى سوق العمل

ااانا معاكو يا جماعة ان بعض المواد رخمة جدا بس لها لازمة ومفيدة لان الاعلامى الناجح لازم يكون عارف القانون والسياسة والاجتماع والنفس بس ممكن نقول ان طريقة التدريس فى الكلية لا تتناسب مع طلبة سيكونوا اعلاميين المستقبل لان الدراسة فى الكلية اكاديمية وليست عملية ولكن بالرغم من كل دة انا شايفة ان فى طلبة قدروا يجتازوا كل دة و يتدربوا ويشتغلوا فى مجال الاعلام بالموهبة وهنلاقى فيهم متفوقين دراسيا.والمشكلة الموجودة فى الكلية بردة نظام الساعات المعتمدة لانى لا اتعرف على المحتوى ككل ومجرد انى بدرس جزء معين فى المقرر واحفظة واكتفى بذلك وبالطبع مش هستفاد حاجة والموضوع دة مش هيتحل الا من ادارة الكلية واهلا بلجنة الاعتماد و الجودة !!